پێنج شەممە, 26 کانونی یەکەم 2013 15:54

نوێنه‌ری ڕۆحانی چاوی به‌ کچه‌کانی شیناوێ که‌وت

 

به‌ ئامانجی بەدواداچوونی داواکارییه‌کان و پڕۆسه‌ی ده‌رمانی کچه‌ سووتاوه‌کانی شیناوێ، نوێنه‌ری سه‌رۆک کۆماری ئێران چاوی به‌ کچه‌کان و بنه‌ماڵه‌کانیان که‌وت.

 

به‌پێی هه‌واڵی هه‌واڵنێری کوردپرێس: پاش ئه‌وه‌ی ڕۆژی دووشه‌ممه‌ 3ی به‌فرانبار ژماره‌یه‌ک له‌ کچه‌ سووتاوه‌کانی شیناوێ و بنه‌ماڵه‌کانیان له‌ به‌رامبه‌ر نووسینگه‌ی سه‌رۆک کۆماری ئێران بۆ‌ ناڕه‌زایی ده‌ربڕین به‌ دواکه‌وتنی پرۆسه‌ی ده‌رمانی کچه‌کان و جێبه‌جێ نه‌کردنی به‌ڵێنه‌کانی به‌رپرسان مانیان گرت، ڕۆژی چوارشه‌ممه‌ 4ی به‌فرانبار، محه‌مه‌د نه‌هاوه‌ندیان، به‌رپرسی نووسینگه‌ی ڕۆحانی له‌گه‌ڵ ئه‌و کچانه‌ و بنه‌ماڵه‌کانیان دیداری کرد.

ڕه‌سووڵ خزری، نوێنه‌ری سه‌رده‌شت و پیرانشار له‌ مه‌جلیسی ئێران له‌مباره‌وه‌ به‌ هه‌واڵنێری کوردپرێسی ڕاگه‌یاند: له‌م دیداره‌دا نه‌هاوه‌ندیان به‌ڵێنی داوه‌ته‌ کچه‌کان و بنه‌ماڵه‌کانیان هه‌موو ڕێوشوێنێکی پێویست بۆ ده‌رمانی کچه‌کان بگیردرێته‌به‌ر و هه‌روه‌ها مووچه‌ی مانگانه‌ی هه‌میشه‌یی بۆ کچه‌کان دابین بکرێت و ده‌رمانیان له‌ باشترین نه‌خۆشخانه‌کان و له‌سه‌ر ده‌ستی دکتۆرانی لێهاتوو ئه‌نجام بدرێت.

هۆکاری ناڕه‌زایی بنه‌ماڵه‌ی کچه‌کانی گه‌ڕانده‌وه‌ بۆ مامەڵه‌ی خراپی نه‌خۆشخانه‌ی تاران که‌ بڕیاربوو نه‌شته‌رگه‌ری کچه‌کان ئه‌نجام بدات و وتی: نه‌خۆشخانه‌که‌ جگه‌ له‌ پاره‌ی یاسایی که‌ ده‌وڵه‌ت داویه‌تی  داوای پاره‌ی زیاتری کردووه‌.

Add comment


Security code
Refresh